Milicsigayga Sannadkii 2023 ( My Annual Review In 2023)
Hordhac
In qofku naf ahaan u xisaabtamo, oo sannadka tagay wax iska
wayddiiyaa waa muhiim. Waliba inuu qofku ogaado wixii u qabsoomay, iyo wixii ka
qabyoobay saamayn wanaagsan ayay mustaqbalkiisa leedahay. In waqti tagay maxaa
qabsoomay iyo maxaa qaldamay la iska wayddiiyaa horumar danbe oo amminta soo
socota ah ayay keentaa. Qofku wixii ka qaldamay sannadka soo socda inuu saxo
ayuu u xadhkaxidhanayaa.Sidoo kale, waxa ay keenaysaa sannadka soo socdana inuu
u diyaargaroobo oo dadaal iyo halgan adag la yimaaddo.
Aniga oo taas ka duulaya, waxa aan rabaa sannadkan
dhammaaday ee 2023 ka aan si kooban u sheego waxa aan dheefay, buugta aan
akhriyay, qoraallada aan qoray, waxa aan bartay, turjumaadda aan sameeyay,
magaalooyinka aan u safray IWM.
Akhriska
Akhrisku waa caadadayda. Maalinkasta waxa aan jeclahay inaan
wax akhriyo. Marka laga yimaaddo maqaallada kookooban ee aan baraha Bulshada
iyo Baloogyada ka akhriyo, buug ii furan ayaan wax ka akhriyaa maalin walba.
Caadada aan leeyahay waxa ay tahay inaan saacado badan akhriyo buugga, dadka
daqiiqado kooban wax akhriya ma ihi, kuwa marka ay fadhiistaan saacado akhriya
ayaan ku jiraa. Akhrisku xiiso gooniya ayuu ii sameeyaa, sannadkan dhammaaday
ee 2022 na xiiso gaar ah ayuu ii lahaa.
Buugaag badan ayaan akhriyay. Qaar ka mid ahi waa kuwan:
1- Buugga la yidhaahdo Alkemistaha ayaan akhriyay
Jan, 2023.
3- Salaad baa I dhaaftay, waxa qoray Cabdixakiin M.
Obsiiye, waxa aan akhriyay Juun-July 2023.
4- Dhabar’adayg, waxa qoray Ibraahin Waabbari, waxa
aan akhriyay Julaay, 2023.
5- Naftaydaay Gacalo, waxa turjumay Maxamed Qaamuus,
waxa aan akhriyay Ogosto 2023.
6- Furaha Ganacsiga, waxa qoray Siciid Cali Shire,
waxa aan akhriyay Ogosto-Sept. 2023.
7- Waayaha Daanyeerta, waxa turjumay Aadan Sahan,
waxa aan akhriyay Sept. 2023.
8- Waxa aan akhriyay buugga “ Halgankii Tukayaasha”
oo uu qoray Cabdisaciid Cabdi Ismaaciil. Waxaanan akhriyay Ock.- Nov, 2023.
9- 10 Magac: Socdaalkii Toddobada Samo. Waxa
turjumay Cabdixakiin Maxamed Obsiiye.
10- Buuga la yidhaahdo ‘ 100 Mashruuc iyo Mashruuc.’ Oo
uu qoray Xamse Xabiib.
Qoraalladayda
Sannadkan marka akhriska laga yimaaddo qoraalka isbeddel
badan ayaan ka sameeyay. Wax buug ah oo aan curiyay way jiraan, se weli way
socdaan. Waxaa se badan maqaallada aqooneed ee aan qoray, gaar ahaan kuwa
gaagaaban. Maqaallada dhaadheeri ma badna. Waxa aan ka xusi karaa:
-
Faallaynta Waraysigii Weriye Cabdalle
Muumin.
-
Faallada Buugga “ Furaha
Ganacsiga”
-
Gorfaynta buugga ‘ 100
Mashruuc iyo Mashruuc’
-
Faallada buuga ‘Salaad baa I dhaaftay.’
-
Faallada Buugga “Mind
Management Not Time Management ~ Maaraynta maskaxda, maaha maaraynta Waqtiga.”
-
Faallada Buugga “ Focus
on What Matters”
-
Faallada Buugga “the 15
Invaluable Laws of Growth ~ 15 Xeer ee Koritaanka”
-
Faallada Buugga “ How To
Become A People Magnet ~ Sideed ku Noqon kartaa Qof Dadka Soo Jiita”
-
Barbaarinta
Carruurta/Ubadka.
Turjumaadda
Qoraalka waxa ii soo raaca turjumaadda maqaallada,
buugaagta, iyo qoraallada aqooneed. Sannadkan dhawr maqaal ayaan turjumay:
-
Talo ku socota qofkasta
oo SHAQAALE AH
-
Ka
Dib Markii Dallacaad Loo Diiday Bangi buu Aasaasay!
Gorfeynta Buugaagta #Xogkorodhsi
Buugaagta aan akhriyo in aan gorfeeyo oo waxa ay ka
hadlayaan wax iska wayddiiyo muhiim baan u arkay. Sannadkii 2018kii ayaan
arrintaas bilaabay. Sannadkii ku xigay ee 2019 inaan sii horumariyo ayaan
qorshaystay. Markii hore maqaal ahaan ayaan ku so gudbin jiray, se waxa aan is
idhi ‘ malaha waxa ka sii fiican inaad muuqaalna ku dartid soo dartid.’ Ugu danbayn waxa aan ku qancay inaan bilaabo
sidii aan dadka ula wadaagi lahaa buugta aan akhriyo oo maqaal iyo muuqaal ba
ah. Dhammaadkii sannadki 2019kii ayaan bilaabay. Saddexdii sabo ee u danbeeyay
Barnaamijka waan waday, waxaanan guud ahaan afartaas sano soo gudbiyay
faallaynta 74 buug. Tacab badan oo hanti, waqti, iyo dadaal ba leh ayaa iga
gala SOOGUDBINTA faallooyinka buugaagta. Wax dan ah oo shakhsi ah oo aan ku
qabaa ma jirto.
Markii aan arkay inay bulshadu u baahantahay Barnaamij ay ka
helaan buugaag kaladuwan oo loo soo koobo ayaan dadaal badan galay. Sababta aan
buugaagta u gorfeeyo waxa ugu muhiimsan:
1-
In qofku xulasho samayn
karo, oo buugaagta kala xulan karo.
2-
In qofkii waayay buug
muhiima oo meel uu joogo aan oollini xogta buugga wax ka ogaado.
3-
In qofkii wax baadhayaa
si fudud meel uu ugu hagaago helo.
Waxa aan bulshada
sannadkan 2023 ga muuqaal ahaan kula
wadaagay dhawr buug. Maqaal iyo muuqaal ba waa lagu heli karaa.
Qaar ka mid ahi waa kuwan:
-
Faallada buugga la
yidhaahdo “ Mind management not time management.”
-
Faallada buugga la
yidhaahdo “ How to become a Magnet.”
-
Faallada buugga la
yidhaahdo “ Focus on What Matters.”
-
Faallada buugga la
yidhaahdo “ The Art of Public Speaking.”
Isbeddellada
Nolosha
Sannadkan 2023 wuxuu ahaa sannadkii iigu isbeddelka badnaa.
Shakhsiyan waxa isoo maray isbeddel nololeed oo badan sida isbeddel shaqo,
isbeddel goobtii aan hore ugu noolaa. Waxa aan gebi ahaan ba baddelay
magaaladii aan sannadihii hore ku noolaa, sidoo kale waxa aan baddelay shaqadii
aan sannadihii danbe qaban jiray. Sababta ugu wayn ee aan u baddelay waxa ay
ahayd bal in aan magaalo kalana tijaabiyo, si aan khibrad tii hore ka duwan uga
helo. Sidaas si la mid ah ujeeddada aan shaqada u baddelay waa inaan helo
khibrad iyo in aan xirfado badan oo aan leeyahay ku shaqeeyo oo ka shaqaysiiyo.
Haddii ay jirto wax ugu wayn oo aan sannadkan bartay waxa
weeyaan in qofku aanu cidna isku hallayne isagu naf ahaantii isku tashado, iyo inay
muhiim tahay inuu qofku shaqada uu muddo hayay baddelo oo mid cusub bilaabo.
Wuxuu ka helayaa khibrad, waaya’aragnimo iyo tamar badan oo uu nolosha ku
tanaado.
Caqabadaha
Caqabuhu way badnaayeen. Waxa ugu adagi waxa ay ahaayeen
waayahay nololeed oo kolba mawjad qofka ku soo beegaya. Dhinaca waqtiga sidii
aan rabay ugama faa’ideysan. Waqti badan ayaa meelo aan habboonayn igu dhaafay.
Gebagebo
Waxa intaas ba barbar socday oo aan ka madhnayn qabashada
shaqooyinka maalinlaha, wax korodhsiga, shaqada, waxbarashada, jimicsiga IWM.
Noloshu intaas sare uun maaha, way ka ballaadhantahay. Se muhiimaddaydu waxa ay
ahayd uun waxa aad korodhsatay xus, si ay xasuus kuugu noqoto, ciddii u
baahanna dhiirrigelin iyo shidaal ugu noqoto, sannadka soo socdana ay ku
talagalaan inay waxbadan korodhsadaan.
Sannadku wuu wanaagsanaa. Sidoo kale, wuu qadhaadhaa, oo
xasuuso adeg ayaa ku jiray. Ka soo socda inuu sidan ka wanaagsanaado ayaan
rajaynayaa.
Dhammaan buugta aan akhriyay ee wax ka qoray, iyaga oo
maqaal ah INTA AAN FAAFIYAY waxaa laga akhrisan karaa: (Sandheere
(cabdirisaaqsandheere12.blogspot.com) ) ama (Cabdirisaaq Sandheere ).
Inta aanan faafinna isla halkaas ayaan soo gelin doonaa Insha Allah. Sidoo
kale, iyaga oo muuqaal ah waxaa laga daawan karaan Janalka #Xogkorodhsi (https://www.youtube.com/channel/UC-DTp2g1U0eiItbuLsNGFCA
).
W/Q: Cabdirisaaq Sandheere
Jannaayo 01, 2024
Comments
Post a Comment